441 粵獨歌曲《我愛妳，大粵國！》Yuet Kiuh演唱混音調校版 呢隻歌多人合唱會好正 期待更多粵獨人參與

441 粵獨歌曲《我愛妳，大粵國！》Yuet Kiuh演唱混音調校版 呢隻歌多人合唱會好正 期待更多粵獨人參與


前兩日上Youtube無意間畀我刮到由荷蘭粵僑Yuet Kiuh生喺個幾禮拜之前獻唱嘅《我愛妳，大粵國！》，真係好鬼興奮，因為終於見到呢隻粵獨歌嘅首唱版本出街。

雖然Yuet Kiuh生呢次獻唱喺好多埞方仍然有待改善（譬如咬字/節拍跟進/震音/尾段用氣），不過唔好唔記得我哋絕大多數粵獨人都唔係專業歌手，我哋啲歌喉可以好業餘甚至乎可以好水皮，而呢首《我愛妳，大粵國！》係直接沿用新生代越南土生粵僑靚聲歌手梁碧友首本名作《Em Yêu Anh》底曲嘅，完全跟足晒原曲嘅音調節拍，《Em Yêu Anh》喺後邊嘅高潮段要求演唱者喺80秒之內一條氣幾乎冇間斷噉以快節拍中高音+拖長震音唱晒27句歌詞一共202個字音出嚟，根據《Em Yêu Anh》改詞嘅《我愛妳，大粵國！》同樣有27句歌詞，總字音數208個甚至比原曲更多，同樣要求演唱者喺80秒之內一條氣幾乎冇間斷噉以快節拍中高音+拖長震音唱晒出嚟，呢個要演繹好佢係非常之考歌手唱功嘅，呢首《我愛妳，大粵國！》講真一啲都唔容易唱，唱得好聽與唔好聽有氣勢同冇氣勢，尤其係要睇尾段嗰80秒嘅用氣。

作為二次創作嘅填詞，我粵嚟粵掂真心多謝Yuet Kiuh生對呢首《我愛妳，大粵國！》作首次試唱，呢隻《我愛妳，大粵國！》係專為武裝粵獨而作，本身定位就係一首軍歌，基於原曲後段激揚嘅氣場，呢隻歌多人合唱會更加之正，因為人多聲大夠氣勢，兼且多人合唱可以掩蓋單人獨唱喺尾段80秒難免產生嘅演繹瑕疵，喺度期待更多粵獨人參與。雖然我唔識作曲，冇辦法對《Em Yêu Anh》原曲相對柔和嘅情歌式風格作進行曲軍歌式硬朗化嘅二次編曲，但係對一啲大路啲嘅半專業音視頻編輯程式我仲係大致舞得掂嘅，利用呢啲工具我哋可以盡最大人事將首歌改到我哋想要嘅樣，以務求彌補我哋冇辦法原創作曲嘅遺憾。

Yuet Kiuh生嘅首唱原始版本講真並唔理想，人聲過細背景聲嘈雜兼且用少咗好多原曲悠揚激盪味道嘅純底曲伴奏，喺度我用AVS Video Editor對呢個首唱原始版本同《Em Yêu Anh》嘅越南語原唱版本作疊加混音，兼且對Yuet Kiuh首唱作聲音增益，以及利用GoldWave Portable對越南語原唱作人聲消減，同時喺AVS Video Editor度盡量保持兩個唱本底曲嘅節拍同步，最後合併輸出，於是就整咗呢個《我愛妳大粵國 荷蘭粵僑Yuet Kiuh演唱 混音調校版》出嚟。

基於同樣原理，假如有多幾個單人獨唱版本出街，我哋完全可以用呢種方式對多個唱本作合併混音調校，從而人工合成出一首聲樂效果好震撼嘅多人合唱版出嚟，雖然噉搞法好似好土炮好唔專業，不過祇要出嚟嘅效果要夠殺夠激揚夠感染到人，噉就話之佢喇。Beyond當年妳估又係咩科班出身咩？佢哋又咪啲飛仔邊緣青年嚟，後嚟靠搞地下樂隊唱啲爛仔歌起家，即使喺90年代初佢哋最威水嗰陣，HK當時嘅流行樂壇始終都視佢哋係異類，之但係噉又點？喺二三十年之後粵語現代文化危難嘅今日，佢哋就打沉晒啲情歌派，廣州撐粵語HK搞遮打革命異出同工一樣要搵佢哋啲經典歌嚟撐場，因為係唔搵唔得，喺粵語勵志歌範疇，Beyond係捨我其誰無出其右！所以話，自古英雄莫問出處，公侯將相本無種吖！

我聽歌從嚟都係齊聽旋律同歌手聲線，唔聽歌詞唔去感受隻歌去唱乜嘅，唯獨有一首例外，就係Beyond嘅《不再猶豫》，呢首歌並唔係Beyond最當紅嘅作品兼且係漢詞粵唱，但係佢就唱出咗我哋粵獨人心境嘅最真實寫照，《不再猶豫》歌詞豪邁旋律激揚成首歌意境奮發向上，當中呢句：“誰人定我去或留？定我心中的宇宙？只想靠兩手向理想揮手，問句天幾高心中志比天更高，自信打不死的心態活到老”係幾咁豪情壯志！《我愛妳，大粵國！》裡頭嘅“獨立建國路艱辛，我哋依然搏命衝，唔理險阻勇創粵獨新生路！”就係因應呢一句而嚟嘅。而《我愛妳，大粵國！》最後一組唱詞“民主自由復興夢，大粵獨立可達到，我愛妳，大粵國！”則係直接對應《不再猶豫》最尾段嗰句“夢想有日達成找到心底夢想的世界，終可見！”。《我愛妳，大粵國！》雖然喺外在旋律同音場同《Em Yêu Anh》一模一樣，但係展現首歌靈魂嘅入骨嘅歌詞，則係源自許冠傑式嘅粵詞粵唱 + Beyond粵語勵志歌嘅豪邁激揚兩者嘅啟發。

----------------------------------------

真正可以展現粵獨精神嘅歌：Beyond《不再猶豫》 鍾意講“實際”最好嗱嗱菻扯人 冇理想真係冇資格講粵獨

http://namyuekok.freeforums.org/beyond-t5356.html

----------------------------------------

粵獨歌曲《我愛妳，大粵國！》 Yuet Kiuh演唱 混音調校版

我愛妳大粵國 荷蘭粵僑Yuet Kiuh演唱版 拉丁粵文新作歌詞 + 繁漢粵文新作歌詞 + 越南文原唱歌詞

http://youtu.be/I_NkVgchhgY

https://www.asuswebstorage.com/navigate/s/630A5027C2224CFAB7EB2B57B73DE2864

----------------------------------------

荷蘭粵僑Yuet Kiuh首唱原始版本（冇作混音同音色調校）

https://www.youtube.com/watch?v=YupjqR4Nkwo

----------------------------------------