024 粵譯作品《其實妳唔明廣東人》

024 粵譯作品《其實妳唔明廣東人》

至於我嘅粵譯作品是否尊重原箸，我惗各人有各自嘅見地，不過既然係我嘅粵譯作品，粵文版嘅出品屬於我，噉我認為加入我嘅見解我嘅色彩係理所當然嘅，我呢篇嘢係粵文作品<其實妳唔明廣東人>，並唔係撈文原箸<其實你不懂廣東人>，記著喇。

原箸<其實你不懂廣東人>嘅文體屬於評議性嘅雜文，佢並唔屬於一啲科技科研性質嘅論文，所以譯法應該以一種寬鬆嘅態度去進行，毋需處處緊貼原文。

我對原箸嘅粵譯總體上係遵從原文嘅思想嘅，原文想要宣發傳揚嘅嘢，喺粵文版裡頭只會放大，而唔係縮小。粵文版對原箸嘅論點，論據，結論唔會有任何顛倒同歪曲，南唔會講成北，西唔會講成東，呢個就係我對呢篇嘢粵譯嘅原則同宗旨。

冇錯，我嘅粵文版同原箸相比的確係感情色彩要濃厚好多，嗒落更加之有味，呢個係我粵文作品與別不同嘅特色，喺我先前發表嘅原創粵文裡頭，我對我哋粵民族感情色彩嘅宣揚比起呢篇嘢唔知要更加熱烈幾多倍。喺我嘅眼裡頭，原箸嘅觀點同措辭好聽啲就叫做理性，唔好聽就叫做軟弱，不過基於尊重原箸，我冇對原作進行剝皮拆骨嘅更動，而只係略略加入少少我哋粵民族嘅感情色彩啫，有咗呢啲元素嘅注入，成篇嘢讀起身會更加之鏗鏘有力，擲地有聲！以達至我嘅粵譯目的：增強我粵民族諸兄弟姊妹對呢篇作品嘅親和力同認受度！