346 粵人喺中世紀已經混入瑤人血統

346 粵人喺中世紀已經混入瑤人血統


鶴山嗰帶係廣府四邑交匯地，亦有唔少所謂嘅「客家」。 鶴山大體文化上屬於廣府，行政劃分上歸四邑管。

有一樣好緊要嘅嘢各位可能唔醒起，四邑高陽三羅山區以前瑤人廣佈，呢帶嘅瑤人後嚟幾乎絕跡（依家陽春西部深山仲有幾條村有瑤人講勉語），去晒邊？咪畀四邑同廣府同化晒囉！剩低嗰啲，就變晒做哎人，亦即所謂嘅「粵西客家」。

四邑至今仲流傳著一個同同化征服瑤人相關嘅習俗，叫：夏至狗，冇得走。狗係苗瑤系民族嘅圖騰，四邑人好食狗肉，就有如西班牙人好食豬肉一樣，係勝利同化或者驅趕異民族嘅一個習俗遺證。

我亞爺亞嫲都係台山嘅，離我鄉下冇幾遠，廿公里都冇，就係台山一個好有名嘅深山區，據新寧史誌記載，喺200幾年前，嗰帶瑤人廣佈，翻查瑤人尤其係勉人資料，發現佢哋有幾個大姓同時亦係廣東嘅大姓，更啱嘅係，我家族嗰個姓就喺呢幾個大姓入邊，睇返我家族嘅祖居地又離瑤人歷史上嘅活躍地咁近，好易令我對我家族以至四邑人嘅真正源流作出重新研判：四邑人查實係越種+瑤種，中部廣府人尤其係三羅肇慶梧州一帶嘅廣府人亦係越種+瑤種。

基本上可以確定，以前分佈喺四邑高陽三羅嘅瑤人經已全數異質化。瑤人融入廣府嘅極多，尤其係喺三羅（羅定雲浮鬱南），三羅係昔日羅旁瑤嘅總竇口，我一睇蔡延楷張相，就100%肯定佢係粵化瑤人嘅後裔。喺廣州周邊鄉郊，亦分佈著唔少鍾姓，鍾係瑤人四大姓之一，廣州鄉郊農村呢啲鍾姓絕對同瑤人相關。瑤人融入四邑嘅應該亦唔少，尤其喺靠近山區嘅埞方。至於嗰啲住喺深山嘅瑤人後嚟點解變晒做所謂嘅“客家”，就真係要再深入研究，13-18世紀，粵東北同粵北嘅“客家”並冇向西江以南大規模遷徙嘅明確記載，相反喺13-18世紀，西江流域瑤人遍佈，呢段時間瑤同“客家”應該冇緊密接觸，既然冇，噉呢啲深山瑤後嚟又點會冚族“講哎”嘅呢？唯一解釋就係，瑤人喺南遷入粵之前，就經已開始咗哎化進程，由瑤變哎，至少歷經五六百年。

廣府嘅南越起源唔使多講，銅鼓扒龍船粵語禾樓舞都有排嗲。四邑嘅越種起源，喺文化上亦有好多遺習遺俗可以追溯。直至幾十年前，新會都好興“住女屋”，台山就有跳禾樓嘅習俗，兼且仲過三月三節。聽我老竇講，台山鄉下以前每逢三月三，啲亞嬸亞姆都要做cei仔（一種外邊黐著好多芝麻炸到金黃式又依又韌嘅甜味糕點）供祭，至於供祭啲乜相信亞嫲嗰輩應該有記憶，不過呢，我哋查實祇需要知道係三月三呢個日子搞就經已明白好多嘢嘞：三月三又叫歌墟節，係侗臺系民族最盛大嘅節日，佢哋會喺呢日供祭祖先，然後齊齊載歌載舞。住女屋跳禾樓三月三，呢啲都係100%嘅侗臺系文化元素，呢啲文化元素喺四邑人身度搵出咁多，足見邑人越底厚重。