317 大粵民國特赦法議案

317 大粵民國特赦法議案

基於對大粵國民仁慈寬恕同功過相抵嘅立法原意，特制訂本法。

1：本法僅適用於擁有大粵民國國籍嘅在囚人士。除非獲得他國在囚嘅粵籍囚犯嘅對等交換，否則大粵羈押嘅非大粵籍囚犯一律永不獲準特赦。

2：特赦係一種旨在寬恕減免對一個囚犯刑罰嘅行政命令，祇有大粵民國總統至有權限發出呢種命令。

3：基於司法獨立原則同行政司法互不干預原則，特赦祇喺行政嘅範疇之內有效，對一個正喺度接受司法調查同聆訊嘅嫌疑人，總統冇權對佢發出特赦。祇有法庭正式裁定疑犯罪成，並將疑犯轉介獄政署服刑，犯人重新納入行政管轄嘅系統之後，總統至有權限考慮對囚犯進行特赦。

4：無論喺任何狀況下低，所有犯有叛國、危害大粵國家安全、對粵種族清洗、故意殺人、強姦、反粵地人類（包括販賣婦女兒童、強迫婦女賣淫、虐殺女嬰疾嬰）呢六種重罪嘅囚犯，一律永不獲準特赦。

5：基於功過相抵原則，祇有曾為大粵獨立、大粵國防安全、大粵疆土拓殖、大粵國力提振騰飛、大粵重大科技進步、大粵公益救助同公義伸張、大粵文化及語言保育作出過貢獻嘅囚犯，曾獲粵軍授勳同嘉獎、大粵各紀律部隊授勳同嘉獎、大粵聯邦政府授勳同嘉獎、大粵20個聯邦實體政府授勳同嘉獎嘅囚犯，曾為國爭光（諸如奧運會或者世界賽獎牌獲得者）嘅囚犯，曾獲國際重大獎項（諸如諾貝爾獎普利策獎菲爾茲獎圖靈獎奧斯卡獎）嘅囚犯，以及曾有卓著政績嘅前政府公務員囚犯，至有資格參與輪候特赦。為對為富不仁嘅犯罪者保持阻嚇，曾經繳交高稅額嘅囚犯並唔屬有特別貢獻之列，冇資格輪候特赦。

6：要求特赦提請人必須係自己本人先有功於粵，再行提請寬恕，假如祇係特赦提請人嘅家屬而非特赦提請人本人有功於粵，噉特赦提請程序將會自動終止。

7：無論刑罰輕重，本法一概適用。亦即係話，即使獲刑終身監禁以至死刑嘅囚犯，祗要要求寬恕嘅理據充分，總統就可以對佢進行特赦。

8：特赦可以係完全赦免，亦可以係寬減赦免，不過無論係完全赦免抑或寬減赦免，囚犯都唔可以取消案底，獲完全赦免嘅囚犯要喺檔案度特別加注總統完全赦免釋放（其他冇獲特赦嘅囚犯一般係加注刑滿釋放），而獲寬減赦免嘅囚犯要喺檔案度特別加注總統寬減赦免釋放。

9：特赦係常態化下嘅工作，而唔係一年祇有一潤或者幾潤嘅畀面盛宴，祗要要求寬恕理據充分，總統可以喺任何時間對囚犯作出特赦。總統特赦個案嘅數目唔作任何上限，亦唔會限制一個月祇可以幾多幾多個，一年祇可以幾多幾多個。喺總統府裡頭，將常設一個特赦候審處嘅機構專責跟進呢一事務。

10：特赦提請步驟首先係由要求特赦提請人自己草擬為自己嘅寬恕求情信，再加其他知名人士（諸如軍政長官、議員法官、學研界巨擎、主教住持、鄉紳寨老、公益義工機構代表、文化及語言保育機構代表）嘅寬恕求情信唔低於20封，合齊之後送去特赦候審處備案輪候特赦審議。

11：特赦候審處將優先安排死刑及終身監禁囚犯嘅特赦提請畀總統處置。對要求特赦個案，總統喺參閱相關寬恕求情信同聽取司法部檢控署律師團代表、聯邦憲法法院法官代表、聯邦參眾兩院司法事務委員會代表意見之後，將獨立作出是否特赦以及乜嘢類型特赦嘅決定。司法部檢控署、聯邦憲法法院、議會司法事務委員會意見僅屬參考性質，對總統決定並冇約束力。

12：一旦總統對一個囚犯作出特赦，該囚犯已獲刑罰嘅之前所犯罪行將被永久豁免再受起訴（假如該囚犯日後再被查出特赦嗰陣未現跡嘅其他罪行，噉呢啲罪行將唔喺特赦覆蓋範疇之內而唔獲豁免起訴）。總統特赦令係終極性命令，聯邦參眾兩院冇權立法阻止，聯邦憲法法院亦冇權接受任何就總統特赦令而提請嘅司法覆核。

13：所謂事不過三，為防濫用，每位大粵國民終生至多祇允許被特赦兩次。